റഷ്യന്‍ സൈന്യത്തില്‍ ചേരാന്‍ പോകുന്ന ഇന്ത്യാക്കാര്‍ക്ക് താക്കീതുമായി വിദേശകാര്യ മന്ത്രാലയം

ദില്ലി: റഷ്യന്‍ സൈന്യത്തില്‍ ചേരാനായി പോകുന്ന ഇന്ത്യക്കാര്‍ക്ക് കടുത്ത താക്കീത് നല്‍കി വിദേശകാര്യ മന്ത്രാലയം. റഷ്യന്‍ സൈന്യത്തിലേക്ക് റിക്രൂട്ട് ചെയ്യുന്ന ഏജന്‍സികളില്‍ നിന്ന് മാറി നില്‍ക്കണമെന്ന് വിദേശകാര്യ മന്ത്രാലയം മുന്നറിയിപ്പ് നല്‍കി. വലിയ ശമ്പളം വാഗ്ദാനം സ്വീകരിച്ച് റഷ്യന്‍ സൈന്യത്തില്‍ ചേരുന്നവര്‍ പിന്നീട് ഇതില്‍ നിന്ന് പിന്മാറാന്‍ വിദേശകാര്യ മന്ത്രാലയത്തെ സമീപിക്കുന്ന സംഭവങ്ങള്‍ കൂടിവരികയാണെന്ന് വിദേശകാര്യ മന്ത്രാലയത്തിന്റെ മാര്‍ഗ്ഗനിര്‍ദ്ദേശത്തില്‍ പറയുന്നു. റഷ്യയിലുള്ള ചില ഇന്ത്യക്കാര്‍ ഇന്ത്യന്‍ പൗരത്വം വേണ്ടെന്ന് വെച്ച് റഷ്യന്‍ സൈന്യത്തില്‍ ചേരാനുള്ള ശ്രമം നടത്തിയെന്നും വിദേശകാര്യ മന്ത്രാലയം വെളിപ്പെടുത്തി. ഇത്തരം നീക്കങ്ങള്‍ ഒരു തരത്തിലും അംഗീകരിക്കില്ലെന്ന് മന്ത്രാലയം പുറത്തിറക്കിയ വാര്‍ത്താക്കുറിപ്പില്‍ വ്യക്തമാക്കി. റഷ്യന്‍ സൈന്യത്തില്‍ ചേര്‍ന്ന നിരവധി ഇന്ത്യക്കാര്‍ കൊല്ലപ്പെട്ട സാഹചര്യത്തില്‍ കൂടിയാണ് ഈ മുന്നറിയിപ്പ്. യുക്രെയിന്‍ പ്രസിഡന്റ് വ്‌ളോദിമിര്‍ സെലന്‍സ്‌കിയും റഷ്യ ഇന്ത്യക്കാരെ അടക്കം സൈന്യത്തില്‍ ചേര്‍ക്കുന്നു എന്ന് ഐക്യരാഷ്ട്രസഭയിലെ പ്രസംഗത്തില്‍ പറഞ്ഞിരുന്നു.