സി.പി.ഐ.എം പെരിയ ലോക്കല്‍ കമ്മിറ്റിയുടെ നേതൃത്വത്തില്‍ വില്ലാരം പതിയില്‍ അനുസ്മരണ പൊതുയോഗവും ബഹുജന സംഗമവും സംഘടിപ്പിച്ചു
CITY NEWS DESK-ANANYA | 13 hours ago | 5 min read
സി.പി.ഐ.എം പെരിയ ലോക്കല്‍ കമ്മിറ്റിയുടെ നേതൃത്വത്തില്‍ വില്ലാരം പതിയില്‍ അനുസ്മരണ പൊതുയോഗവും ബഹുജന സംഗമവും സംഘടിപ്പിച്ചു. ഒക്ടോബര്‍ 15, 16 തീയതികളില്‍ കാസര്‍ഗോഡ് നടക്കുന്ന സി.പി.ഐ.എം കാസര്‍ഗോഡ് വിപുലീകൃത കമ്മിറ്റിയുടെ ഭാഗമായാണ് ബഹുജന സംഗമം സംഘടിപ്പിച്ചത്. കൂടാതെ പുല്ലൂര്‍ പെരിയ പഞ്ചായത്തില്‍ ഇടതുപക്ഷ പുരോഗമന പ്രസ്ഥാനം പടുത്തുയര്‍ത്തുന്നതില്‍ പ്രധാന പങ്കു വഹിച്ച നേതാക്കളായ എ. ശേഖരന്‍ നായര്‍, കെ.കുഞ്ഞിക്കണ്ണന്‍ എന്നിവരുടെ അനുസ്മരണ പൊതുയോഗവും ഇതോടൊപ്പം നടന്നു. ചെക്കി പള്ളത്തു നിന്നും ബാന്‍ഡ് മേളത്തിന്റെയും കേരളീയ വേഷമണിഞ്ഞു ചെങ്കൊടിയേന്തിയ 100 വനിതകളുടെയും മറ്റ് നിരവധിപാര്‍ട്ടി പ്രവര്‍ത്തകരുടെയും നേതൃത്വത്തില്‍ പ്രകടനത്തോടുകൂടിയാണ് പരിപാടി ആരംഭിച്ചത്. വില്ലാരം പതിയില്‍ സമാപിച്ച പ്രകടന അനന്തരം ഡി.വൈ.എഫ്.ഐ കേന്ദ്ര കമ്മിറ്റി അംഗം എം.ഷാജിര്‍ ബഹുജന സംഗമവും അനുസ്മരണ പൊതുയോഗവും ഉദ്ഘാടനം ചെയ്തു.കേരളത്തിന്റെ ജാതകമെഴുതിയ പാര്‍ട്ടിയാണ് സി.പി.ഐ.എം എന്നും കേരളം ഭരിച്ചപ്പോള്‍ സി.പി.എം നേതൃത്വം നല്‍കിയ സര്‍ക്കാര്‍ കൊണ്ടുവന്ന നിയമങ്ങളാണ് കേരളത്തിലെ ജനങ്ങള്‍ക്ക് ഇവിടെ ഇന്നത്തെ പോലെ ജീവിക്കുന്നതിന് വഴിയൊരുക്കിയത് എന്നും അദ്ദേഹം പറഞ്ഞു. ഏരിയ കമ്മിറ്റി മെമ്പര്‍ എന്‍. ബാലകൃഷ്ണന്‍ അധ്യക്ഷത വഹിച്ചു. സി.പി.ഐ.എം കാഞ്ഞങ്ങാട് ഏരിയ സെക്രട്ടറി അഡ്വക്കേറ്റ് കെ. രാജ് മോഹനന്‍ അനുസ്മരണ പ്രഭാഷണം നടത്തി. ഏരിയ കമ്മിറ്റി അംഗങ്ങളായ എ .ഷാജി,എസ് ശബരിനാഥന്‍, പി ജ്യോതി ബസു, പുല്ലൂര്‍ പെരിയ പഞ്ചായത്ത് പ്രസിഡണ്ട് ഡോക്ടര്‍ സി. കെ. സബിത,പുല്ലൂര്‍ ലോക്കല്‍ സെക്രട്ടറി ടി. ബിന്ദു, എം. മോഹനന്‍, ശാരദ എസ്. നായര്‍, പി. കൃഷ്ണന്‍, കെ. ദിനേശന്‍ എന്നിവര്‍ സംസാരിച്ചു. പെരിയ ലോക്കല്‍ സെക്രട്ടറി ടി.ഷാജീവന്‍ സ്വാഗതം പറഞ്ഞു.തുടര്‍ന്ന് പാര്‍ട്ടിയെ കെട്ടിപ്പടുത്തുന്നതില്‍ പ്രധാന പങ്കുവഹിച്ച 70 വയസ്സിന് മുകളിലുള്ള പാര്‍ട്ടി അംഗങ്ങളെ ആദരിക്കുകയും വിവിധ മേഖലകളില്‍ കഴിവ് തെളിയിച്ചവരെ അനുമോദിക്കുകയും ചെയ്തു.
- എഴുതിയത്
- CITY NEWS DESK-ANANYA
- നഗരം / വിഭാഗം
- Kasaragod