സംസ്ഥാനത്ത് 49 റോഡുകള്‍ അടച്ചു, വൈദ്യുതിയും കുടിവെള്ളവും തടസ്സപ്പെട്ടു; 15 കോടിയിലധികം രൂപയുടെ നാശനഷ്ടം, മഴക്കെടുതിയില്‍ വലഞ്ഞ് ഹിമാചല്‍ പ്രദേശ്

ദില്ലി: ഹിമാചല്‍ പ്രദേശില്‍ മഴക്കെടുതി തുടരുന്നു. ഇന്നലെ മാത്രം മഴക്കെടുതിയില്‍ മൂന്ന് പേരാണ് മരിച്ചത്. ഇതോടെ ഈ മണ്‍സൂണ്‍ കാലത്ത് സംസ്ഥാനത്ത് മഴക്കെടുതികളില്‍ മരിച്ചവരുടെ എണ്ണം 12 ആയി ഉയര്‍ന്നു. മഴയെത്തുടര്‍ന്ന് സംസ്ഥാനത്ത് 49 റോഡുകള്‍ അടച്ചു. കുളു ജില്ലയില്‍ മാത്രം 30 റോഡുകളാണ് അടച്ചത്. കൂടാതെ മൂന്ന് വൈദ്യുതി ട്രാന്‍സ്ഫോര്‍മറുകളും 23 കുടിവെള്ള പദ്ധതികളും തടസ്സപ്പെട്ടു. ഈ മണ്‍സൂണ്‍ സീസണില്‍ ഇതുവരെ ഏകദേശം 15 കോടിയിലധികം രൂപയുടെ നാശനഷ്ടങ്ങളാണ് സംസ്ഥാനത്തുണ്ടായിരിക്കുന്നത്. സംസ്ഥാനത്ത് രക്ഷാ പ്രവര്‍ത്തനത്തിനായി എന്‍ഡിആര്‍എഫ്, എസ്ഡിആര്‍എഫ് സംഘങ്ങള്‍ രംഗത്തുണ്ട്. ഇന്നും നാളെയും സംസ്ഥാനത്ത് കനത്ത മഴയ്ക്ക് സാധ്യതയുള്ളതിനാല്‍ കാലാവസ്ഥാ നിരീക്ഷണ കേന്ദ്രം ഓറഞ്ച് അലേര്‍ട്ട് പുറപ്പെടുവിച്ചിട്ടുണ്ട്.