10 വര്‍ഷം ഭരിച്ചിട്ട് 500 ഗ്രാം എംഡിഎംഎ പോലും പിടിച്ചില്ലെന്ന രമേശ് ചെന്നിത്തലയുടെ ആരോപണം; കണക്ക് നിരത്തി പിണറായി വിജയന്റെ മറുപടി

തിരുവനന്തപുരം: കഴിഞ്ഞ സര്‍ക്കാര്‍ ലഹരി മാഫിയക്കെതിരെ ഒന്നും ചെയ്തില്ലെന്ന ആഭ്യന്തര മന്ത്രി രമേശ് ചെന്നിത്തലയുടെ ആരോപണത്തിന് മറുപടിയുമായി മുന്‍ മുഖ്യമന്ത്രി പിണറായി വിജയന്‍. 10 വര്‍ഷം ഭരിച്ചിട്ട് 500 ഗ്രാം എംഡിഎംഎ പോലും പിടിക്കാന്‍ കഴിഞ്ഞില്ല എന്നാണ് ചെന്നിത്തല പറഞ്ഞത്. 2024 ജൂലൈയില്‍ തൃശൂരില്‍ പിടികൂടിയ 2.4 കിലോ എംഡിഎംഎയുടെ ഉറവിടം തേടിപ്പോയ കേരള പൊലീസ് ഹൈദരാബാദിലെ അന്താരാഷ്ട്ര ലഹരി നിര്‍മ്മാണ ലാബ് അടക്കം പൂട്ടിച്ചത് പിണറായി വിശദീകരിച്ചു. തെലങ്കാന ഭരിക്കുന്ന രേവന്ത് റെഡ്ഡിക്ക് സാധിക്കാത്ത കാര്യമാണ് കേരള പൊലീസ് അവിടെ ചെയ്തതെന്ന് പിണറായി പറഞ്ഞു. എല്‍ഡിഎഫ് സര്‍ക്കാരിന്റെ ലഹരിവിരുദ്ധ പ്രവര്‍ത്തനങ്ങള്‍ മാതൃകാപരമായിരുന്നു എന്ന് പാര്‍ലമെന്റിലെ രേഖകളിലുണ്ടെന്നും പിണറായി വിജയന്‍ ചൂണ്ടിക്കാട്ടി. സ്വന്തം ആളുകള്‍ കുടുങ്ങിയപ്പോള്‍ അന്വേഷണം അട്ടിമറിച്ചവരാണ് ഇപ്പോള്‍ ഓപ്പറേഷന്‍ തൂഫാന്റെ പേരില്‍ പിആര്‍ മഹാമഹം തീര്‍ക്കുന്നതെന്നും പിണറായി വിജയന്‍ വിമര്‍ശിച്ചു.