രാജ്യത്ത് സാറ്റലൈറ്റ് ഫോണ്‍ അവതരിപ്പിച്ച് ബിഎസ്എന്‍എല്‍; ആര്‍ക്കൊക്കെ വാങ്ങാം?

ഡല്‍ഹി: ഇന്ത്യയില്‍ സാറ്റലൈറ്റ് ഫോണ്‍ അവതരിപ്പിച്ച് ബിഎസ്എന്‍എല്‍. മൊബൈല്‍ ടവറുകള്‍ ഇല്ലാത്ത ഉള്‍പ്രദേശങ്ങളിലും ആശയവിനിമയം സാധ്യമാക്കുന്നതിന് വേണ്ടിയാണ് പുതിയ സാറ്റലൈറ്റ് ഫോണ്‍ അവതരിപ്പിച്ചത്. 1,34,166 രൂപയാണ് ഇതിന്റെ വില. ഇന്‍മാര്‍സാറ്റ് പോലുള്ള ആഗോള സാറ്റലൈറ്റ് നെറ്റ്വര്‍ക്ക് ദാതാക്കളുമായി സഹകരിച്ചാണ് ഈ ഹാന്‍ഡ്സെറ്റ് വികസിപ്പിച്ചിരിക്കുന്നതെന്ന് കമ്പനി അറിയിച്ചു. സാധാരണ സ്മാര്‍ട്ട്ഫോണില്‍ നിന്ന് വ്യത്യസ്തമായി, സെല്ലുലാര്‍ നെറ്റ്വര്‍ക്കുകള്‍ക്ക് പകരം ഉപഗ്രഹങ്ങള്‍ ഉപയോഗിച്ചാണ് ഇത് പ്രവര്‍ത്തിക്കുന്നത്. മൊബൈല്‍ കവറേജ് ലഭ്യമല്ലാത്ത പ്രദേശങ്ങളിലും അടിയന്തര സാഹചര്യങ്ങളിലും തടസങ്ങളില്ലാതെ വോയ്സ് കോളുകള്‍ ചെയ്യാന്‍ ഇത് സഹായകരമാകും.